Quba haqqında
Quba rayonu
Quba rayonu 8 avqust 1930-cu ildə yaradılıb. Ərazisi 2,58 min kv.km-dir. Zəngin tarixə və füsunkar təbiətə malik Quba rayonu Azərbaycanın şimal şərqində Quba-Xaçmaz iqtisadi rayonunun tərkibində yerləşir. Quba ərazisinə görə Azərbaycanın ən böyük rayonudur.
Quba rayonunda hazırda idmanın 22 növü (atletika, gimnastika, cüdo, taekvondo, boks, sərbəst güləş, atıcılıq, futbol, badminton, yunan-Roma güləşi, üzgüçülük, stolüstü tennis, voleybol, basketbol, dama, nərd, karate, alpaqut, kikboksinq, qrapplinq, sambo, şahmat) üzrə bölmələrdə 8472 nəfərə yaxın uşaq, yeniyetmə və gənc idmanla məşğul olur.
Quba−Xaçmaz Regional Gənclər və İdman İdarəsi
10 dekabr 2022-ci il tarixində Azərbaycan Respublikasının Prezidenti İlham Əliyev Gənclər və İdman Nazirliyinin strukturunun təkmilləşdirilməsi haqqında Sərəncam imzalayıb. Sərəncama əsasən, Xaçmaz, Quba, Qusar, Siyəzən və Şabran rayon gənclər və idman idarələrinin əsasında Quba−Xaçmaz Regional Gənclər və İdman İdarəsi yaradılıb.
Qubanın idman infrastrukturu
Quba rayonunda ən böyük idman qurğusu Quba Olimpiya İdman Kompleksidir. Kompleks 2003-ci il oktyabrın 13-də istifadəyə verilib. Ərazisi 14 hektar olan bu kompleksdə 1100 nəfər tamaşaçı tutumu olan universal zal, güləş, cüdo, kikboksinq, karate, fitnes, bilyard və stolüstü tennis zalları mövcuddur.
6600 nəfər tamaşaçı tutumu olan Arena Quba futbol stadionu, 3 ədəd minifutbol, basketbol, tennis və voleybol meydançaları vardır. Həmçinin 340 nəfər tamaşaçı tutumu olan 50x25 metrlik üzgüçülük hovuzu, SPA mərkəzi, şahmat və uşaq əyləncə mərkəzi fəaliyyət göstərir.
Bunlardan əlavə kompleksdə 130 nəfərlik (əlavə 100 nəfərlik açıq havada) tədbir zalı, 120 nəfərlik (əlavə 100 nəfərlik açıq havada) restoran, 70 nəfərlik kafe, 80 nəfərlik (əlavə 60 nəfərlik açıq havada) kafe, 100 və 63 yerlik konfrans zalları, 3 iclas otaqları fəaliyyət göstərir.
Kompleksin ərazisində 78 otaqlı, 5 mərtəbəli 156 yataq yeri olan Arena Grand Hotel, 3 mərtəbəli, 32 otaqlı 64 yataq yeri olan Arena Sport Hotel, 20 otaqlı 80 yataq yeri olan Arena Apartments, 3 ədəd 18 yataq yeri olan Arena Villas, 1 ədəd 8 yataq yeri olan VİP Villa və 10 otaqlı 24 yataq yeri olan inzibati bina vardır.
Quba Olimpiya İdman Kompleksindən başqa rayonda "Quba" idman klubu; Şahin Allahyarov adına Quba İEUGİŞM; "Pəhləvan Əli" idman klubu; "Nicat" idman klubu; "Şahdağ-Quba" idman klubu; "Uhud" idman klubu fəaliyyət göstərir.